जनकपुरधाम- मधेश प्रदेशका ३८ पालिकाका करिब ११ हजार ४ सय कर्मचारी यस वर्ष दशैँमा तलब र भत्ता पाउन नसक्ने अवस्थामा पुगेका छन् ।
चालु आर्थिक वर्षको बजेट अहिलेसम्म पेस हुन नसकेको र कार्यालयहरू दशैँको बिदाका लागि छोटो अवधिका लागि मात्र खुला हुने भएकाले उनीहरूको दशैँ खल्लो हुने अवस्था आएको हो ।
राजविराज नगरपालिकाका लेखा अधिकृत शत्रुधन दासले भने, ‘अब पाँच दिन मात्रै कार्यालय खुल्ने भएकाले बजेट पास भए पनि तलब निकासा हुने समय नपुग्ने सम्भावना छ ।’ चालु आर्थिक वर्षको तेस्रो महिना अर्थात् असोज ५ गतेसम्म यी ३८ पालिकाले बजेट ल्याउन नसकेको देखिएको छ ।
मधेश प्रदेशमा जम्मा १३६ पालिका छन् । त्यसमध्ये ९८ वटा पालिकाले बजेट पास गरिसकेका छन् । तर, एक उपमहानगरपालिका, १८ नगरपालिका र १९ गाउँपालिकाले अहिलेसम्म बजेट पेस गर्न सकेको छैन । सङ्घीय मामिला तथा सामान्य प्रशासन मन्त्रालयको पोर्टलका तथ्यांक अनुसार सिरहाको १७ मध्ये तीन, सर्लाहीको २० मध्ये पाँच, रौतहटको १८ मध्ये पाँच, बाराको १६ मध्ये चार र पर्साको १४ मध्ये पाँच पालिकाले बजेट पेस गर्न नसकेको देखिन्छ ।
