सिरहा । नेपाली कांग्रेस सिरहा जिल्ला अनुशासन समितिले अष्ट्रेलियाकी राजदुत तथा कांग्रेस पूर्व केन्द्रीय सदस्य चित्रलेखा यादवका पति डाक्टर श्रीकृष्ण यादवसहित ५ जनालाई कारवाही सिफारिस गरि केन्द्रलाई पत्राचार गरेका छन् ।
उनीहरुले सिरहा-२ का उम्मेदवार कांग्रेस सिरहा सभापति रामचन्द्र यादवलाई गत फागुन २१ गते भएको प्रतिनिधिसभा चुनाव असहयोग र अन्तरघात गरेको आरोप छ ।
कारवाही सिफारिसमा पर्नेहरुमा श्रीकृष्णसहित महाधिवेशन प्रतिनिधि तथा तरुण दल केन्द्रीय सदस्य सुभाष यादव दास, महादेव यादव, क्षेत्रीय सचिव सत्रुधन प्रसाद चौधरी र जिल्ला सदस्य निलकुमार राउत रहेका छन् । उनीहरुले चुनावमा सहयोग नगरेको सभापति यादव पक्षको भनाइ रहेको स्रोतले जनाएको छ।
