बंगलादेशमा बिहीबार सम्पन्न संसदीय निर्वाचनमा बंगलादेश नेसनालिस्ट पार्टी (बीएनपी) ले स्पष्ट बहुमत पाएको छ। कुल २९९ सिटको निर्वाचनमा बीएनपीले २०९ सिट जितेको छ।
बंगलादेशमा ३ सय सिटमा प्रत्यक्ष निर्वाचन हुने व्यवस्था छ र बहुमतका लागि १५० सिट आवश्यक पर्छ। समाचार तयार पार्दासम्म २८६ सिटको मतपरिणाम सार्वजनिक भइसकेको छ।
जमात–ए–इस्लामी नेतृत्वको ११ दलीय गठबन्धनले ७० सिट मात्र जितेको छ। जमातका प्रमुख शफिकुर रहमान ढाका–१५ बाट विजयी भएका छन्। यससँगै करिब २० वर्षपछि बीएनपीको नेतृत्वमा बंगलादेशमा सरकार बन्ने निश्चित भएको छ।
सन् २००१ को निर्वाचनमा जीत हासिल गरी खालिदा जियाले २००६ सम्म सरकार चलाएकी थिइन्। त्यसयता बीएनपीले चुनाव जितेको थिएन। सन् २००८ देखि २०२४ सम्म लगातार अवामी लिगको सरकार रहेको थियो र शेख हसिना सत्ता शीर्षमा रहिन्। यसपटक, अवामी लिगलाई चुनावमा प्रतिबन्ध लगाएर गरिएको निर्वाचनमा बीएनपी विजयी भएको हो।
यो ऐतिहासिक जितसँगै खालिदा जियाका छोरा तारिक रहमान अब बंगलादेशको प्रधानमन्त्री बन्ने निश्चित भएका छन्। यस चुनावले ३५ वर्षपछि पुरुष प्रधानमन्त्रीलाई सत्ता ल्याएको छ।
बंगलादेशमा साढे तीन दशकभन्दा लामो समयसम्म खालिदा जिया र शेख हसिनाले शासन गरेका थिए।
