सिरहा,बरियारपट्टी- बरियारपट्टी गाउँपालिका वडा नं.–१ अन्तर्गत रहेको कचनारी छोटकी टोलको एकमात्र पोखरी फोहर तथा दुर्गन्धित हुदा , यस वर्षको छठ पर्व प्रभावित हुने देखिएको छ। स्थानीय बासिन्दाहरूले वर्षाको कारण पोखरीमा माटो, प्लास्टिक, झारपात लगायत अन्य फोहर जम्मा भएको गुनासो गरेका छन्।
कचनारी टोलमा यो पोखरी नै छठ पर्वका लागि एक मात्र सूर्य अर्घ दिने मुख्य स्थल हो। पोखरीको सरसफाइ नहुँदा व्रतिनी महिलाहरू तथा भक्तजनहरूलाई पूजा–अर्चनामा समस्या हुने अवस्था सिर्जना भएको छ। स्थानीय बासिन्दाहरूका अनुसार, “प्रत्येक वर्ष यस पोखरीमा छठ पूजाको आयोजना हुँदै आएको हो, तर यस वर्ष फोहरले गर्दा पूजा स्थल बनाउन पनि गाह्रो भएको छ।”
उक्त पोखरीको सफाइका लागि स्थानीयवासीहरूले पटक–पटक वडा कार्यालयमा ध्यानाकर्षण गराए पनि हालसम्म कुनै पहल नभएको स्थानीयले बताएका छन्। छठ पर्व नजिकिँदै जाँदा पोखरी सरसफाइ र मर्मत कार्य तत्काल गर्न नसकिए गाउँकै ठूलो धार्मिक पर्व प्रभावित हुने चिन्ता सर्वत्र देखिएको छ।
