जनकपुर – मधेस प्रदेशमा लोकतान्त्रिक समाजवादी पार्टी (लोसपा)का उपाध्यक्ष जितेन्द्र प्रसाद सोनलले नयाँ सरकार गठनको दाबी पेश गरेका छन्। उनले नेकपा (माओवादी केन्द्र), जनमत पार्टी, जनता समाजवादी पार्टी(जसपा)नेपाल र नेकपा (एकीकृत समाजवादी)को समर्थनमा बुधबार प्रदेश प्रमुखसमक्ष दाबी पेस गरेका हुन्।
सोनलले बहुमतको समर्थन प्राप्त भएको दाबी गर्दै पाँच दलको गठबन्धनमा सरकार गठनको प्रक्रिया अघि बढाएका हुन्। यसपटक कांग्रेस र एमालेलाई बाहिर राखेर नयाँ सत्ता समीकरण बनेको छ।
१०७ सदस्यीय मधेस प्रदेशसभामा हाल १०५ जना सदस्य छन्। तीमध्ये एमालेका एक निलम्बितसहित २५, नेपाली कांग्रेसका २२, जसपा नेपालका १९, जनमतका १३, माओवादी केन्द्रका ९, लोसपाका एक निलम्बितसहित ९, एकीकृत समाजवादीका ७ र राप्रपा, नागरिक उन्मुक्ति पार्टी र संघीय समाजवादी पार्टीका १–१ जना सांसद छन्।
सोनलको पक्षमा माओवादी केन्द्र, जनमत, जसपा, एकीकृत समाजवादी र लोसपाका गरी ५६ सांसदको समर्थन देखिएको छ। यो समर्थन संख्या सरकार गठनका लागि आवश्यक बहुमतभन्दा बढी हो।
अब प्रदेश प्रमुखले संविधानको धारा १६८ (२) अनुसार बहुमतको आधारमा सरकार गठनको प्रक्रिया अघि बढाउने अपेक्षा गरिएको छ।
