बरियारपट्टी:पछिल्लो समय सिराहामा नियामक निकायकै सेटिङमा खुल्ला सीमा–नाकाहरुबाट व्यापक रुपमा तस्करी भईरहेको पाईएको छ। जिल्लाका सीमा नाकामा तैनाथ शसस्त्र प्रहरी, सीमा सुरक्षामा खटाइएको नेपाल प्रहरी र भन्सार कार्यालयकै सेटिङमा दिनदहाडै तस्करी भइरहेको हो।
खुल्ला सीमाक्षेत्रमा पर्ने भारतीय बजार लौकाहा, लदनीयाँ, जयनगरलगायतबाट खाद्यान, किरानासामान, लत्ताकपडाजस्ता सामाग्रि नियमनकारी निकायकैकै निगरानीमा मुख्य बाटो नहुदै नियमनकारी निकायहरूकै सल्लाह अनुसार खुला सिमानाको कारण बैकल्पिक बाटोको प्रयोग गरि नेपाल भित्रीने गरेको सीमाक्षेत्रका बासिन्दाहरु बताउँछन्।”यसैलाई भन्छ मुखमा राम-राम बगलमा छुरा”
दैनिक उपभोग्य सामाग्रीसँगै नजिकिदै गरेको चाडपर्वलाई लक्ष्यित गर्दै भारतबाट अहिले नै नागिन पटाका, हाईड्रो बम, बारुद लगायत लागुऔषधको केन्द्रको रूपमा रहेको बरियारपट्टी नाका लगायत अन्य नाकाहरूबाट लागुऔषध समेत भित्रिनथालेपछि सीमाक्षेत्रका बासिन्दाहरु त्रसित बनेका छन्। हातहतियारका चोरी पैठारीले सीमावर्तीक्षेत्रमा आपराधिक घटना घट्न सक्ने त्रासमा छन् स्थानीय ।
तस्करी बढेपछि राजस्व घटदै
प्रहरी प्रशासनकै सेटिङ्गका कारण जिल्लाको माडर, औरही, बरियारपट्टी ,नरगी, कुसन्डी, झाझपट्टी, चतरी, कल्याणपुर, पटेर्वा लगायतका नाका तथा चोरबाटो प्रयोग गरी यस क्षेत्रमा व्यापक चोरी तस्करी बढेपछि भन्सार कार्यालय माडरको राजस्व असुली अवस्था निरन्तर खस्किदै गइरहेको देखिएको छ।
भन्सार कार्यालय माडर खैरटोकाले गत आर्थिक वर्ष २०८०/०८१मा लक्ष्यको ७९ प्रतिशतमात्र रकम उठाएको छ। कार्याललयले लिएको वार्षिक लक्ष्य ११ करोड ९९ लाख ५६ हजारमा कुल रकमको ७९ प्रतिशत अर्थात ९ करोड ४६ लाख ८ हजार रुपैयाँ मात्र राजस असुली भएको सिरहा भन्सार कार्यालय माडर खैरटोकाका प्रमुख तोयानाथ सापकोटाले जानकारी दिए।
गत आर्थिक वर्षको खैरटोका भन्सारबाट सबै भन्दा बढी एलवेस्टरबाट भन्सार उठेको कार्यालयले जनाएको छ । प्रमुख सापकोटाले पछिल्लो दिनमा आफू हाजिर भएपछि भन्सार संकलनमा वृद्धि भएको बताए। गत फागुन महिनादेखि लक्ष्यभन्दा बढी भन्सार उठेको भएपनि सम्पूर्णमा कम उठेको छ।
