सिराहा, बरियारपट्टी — “जनताको सरकार” भन्ने नारासहित सञ्चालनमा रहेको बरियारपट्टी गाउँपालिकामा जनप्रतिनिधि तथा कर्मचारीको लापरबाही र गैरजिम्मेवारीका कारण नयाँ वर्ष २०८३ को मुखमा समेत शिक्षक तथा कर्मचारीहरूको तलब निकासा हुनसकेका छैन। तलव निकासा नहुदा उनीहरू गम्भीर आर्थिक तथा मानसिक पीडामा परेका छन्।
स्थानीय विद्यालयका शिक्षकहरूका अनुसार, महिनौँसम्म तलब नपाउँदा दैनिक जीवनयापनमा समस्या उत्पन्न भएको छ। यो कुनै एकपटको कुरो होइन, समयमा तलव निकास नहुने यस पालिकाकालागि समान्य जस्तै भएको छ। हामी पटकपटक दसै तिहार जस्तो महान पर्वमा पनि समयमा तलव खान सकेका छैनौं प्राय शिक्षकहरूको भनाइ रहेका छन् ।
“नयाँ वर्ष मनाउने बेला हात खाली छ, घरपरिवार चलाउनै गाह्रो भयो,”हुलाकी टुडे संग एक शिक्षकले गुनासो गरे।
तलब नआउँदा बैंकको ऋण तिर्न, घरखर्च चलाउन तथा बालबालिकाको पढाइ खर्च जुटाउन समस्या परेको उनीहरूको भनाइ छ।
यस विषयमा गाउँपालिकाका सम्बन्धित अधिकारीहरूसँग पटक–पटक जानकारी माग्दा पनि स्पष्ट जवाफ नआएको पीडित शिक्षक तथा कर्मचारीहरूको आरोप छ। जिम्मेवार निकाय मौन बस्दा समस्या झन् जटिल बन्दै गएको छ।
स्थानीय बासिन्दाहरूले समेत यस घटनाप्रति आक्रोश व्यक्त गरेका छन्। “जनताको सेवा गर्न आएका प्रतिनिधिहरू नै जनताको दुःख नबुझ्ने भएपछि जनताको सरकारको अर्थ के?” भन्ने प्रश्न आम जनसमुदायमा उठ्न थालेको छ।
