सिरहा, बरियारपट्टी– बरियारपट्टी गाउँपालिकामा कार्यरत शिक्षकहरूले तलब समयमा नपाउँदा समस्यामा परेका छन साथै दैनिक जीवनयापनमा कठिनाइ भोग्नुपरेको छ। विद्यालयमा पठनपाठन नियमित गर्न शिक्षकहरूले अहोरात्र खटिए पनि समयमा तलब नपाउँदा उनीहरू आर्थिक समस्यामा परेका छन्।
श्री जनता मा.वि.बरियारपट्टीका शिक्षकहरूका अनुसार केही महिना यता पालिकाले तलब वितरणमा ढिलासुस्ती गरेको छ। यसले गर्दा हामीहरूको बैंकको ऋण, घरखर्च र बालबालिकाको शिक्षाजस्ता दैनिक आवश्यकताहरू पूरा गर्न कठिनाइ भएका छन्।
गाउँपालिकामा कार्यरत शिक्षक अरविन्द्र कुमारले भने, “हामीले आफ्नो जिम्मेवारी पूरा गरेका छौं, तर समयमा तलब नआउँदा परिवार पाल्न गाह्रो भइरहेको छ। सरकारले पालिकालाइ शिक्षकहरूको मासिक रूपमा तलव निकासा गर्ने पटकपटक पत्राचार गर्दा पनि पालिकाले आफ्नो लाचारी देखाउदै कार्यनयनमा ल्याउन सकेन।
बरियारपट्टी पालिकाका कर्मचारी र जनप्रतिनिधिहरूको अति निष्क्रिय छ कि,शिक्षकहरूको मासिक तलव खुवाउनु त परको कुरा हो,त्रेमासिक रूपमा पनि तलव खुवाउन असमर्थ छ। शिक्षा शाखा कर्मचारी विहीन छ।
शिक्षकहरूको तलब सम्बन्धी समस्याले विद्यालयको पठनपाठनमा समेत प्रभाव पारेको छ। केही शिक्षकहरूले मानसिक तनावका कारण कक्षा सञ्चालन गर्न कठिनाइ भएको बताएका छन्।
यस समस्याले शिक्षकहरूको सम्मानजनक जीवनयापनमा गम्भीर प्रश्न खडा गरेको छ। सरोकारवाला निकायले यथाशिघ्र समाधान खोजेर शिक्षाको गुणस्तर सुधारमा ध्यान दिनुपर्ने स्थानीयहरूको माग छ।
