सिरहा : सिरहास्थित प्रादेशिक अस्पतालमा उपचारको क्रममा एक बालकको मृत्यु भएको छ । मृत्यु हुनेमा सिरहा नगरपालिका–६ बसबिट्टाका झल्लु महराका १० वर्षीय छोरा राजन महरा छन् । उपचारमा लापरबाहीको कारण मृत्यु भएको भन्दै आक्रोशित आफन्त र स्थानीयबासी अस्पतालमा तोडफोडको प्रयास गरेपछि प्रहरीसँग झडप भएको छ
झडपको क्रममा ९ जना प्रहरी र एक महिला गरी १० जना घाइते भएको जिल्ला प्रहरी कार्यालय सिरहाका प्रवक्ता डिएसपी विरेन्द्रकुमार पासवानले जानकारी दिए । अवस्था नियन्त्रणमा लिन प्रहरीले अश्रुग्याससमेत प्रहार गरेको थियो ।
दुई दिनदेखि ज्वरो आएको बालक राजनलाई असहज भएपछि आज बिहान अस्पताल ल्याइएको थियो । ठुलीआमा सोभा महराका अनुसार, चिकित्सकले दूध र बिस्कुट खुवाएर सुई लगाएपछि बालक चिच्याउँदै ढलेका थिए र त्यसपछि मृत्यु भयो ।
मृतकका आफन्तजन र स्थानीयवासीले दोषी चिकित्सक तथा अस्पताल व्यवस्थापन समितिका अध्यक्ष सोहेन्द्र प्रसाद यादवमाथि कारबाहीको माग गर्दै प्रदर्शन गरेका छन्। हाल प्रादेशिक अस्पताल सिरहाको अवस्था तनावग्रस्त छ ।
