भारतीय राष्ट्रिय कंग्रेस नेता राहुल गान्धीले चुनाव जितेका दुई लोकसभा सिटमध्ये केरलको वायनाड छाड्ने निर्णय गरेका छन्।
बिबिसीका अनुसार उक्त क्षेत्रबाट राहुलकी बहिनी तथा कांग्रेस नेता प्रियंका गान्धीले चुनाव लड्ने कांग्रेस अध्यक्ष मल्लिकार्जुन खड्गेले बताएका छन्।
पछिल्लो लोकसभा निर्वाचनमा राहुल केरलको वायनाड र उत्तर प्रदेशको रायबरेलीबाट निर्वाचित भएका थिए।
‘रायबरेली र वायनाडबाट अब हाम्रा दुई जना सांसद लोकसभामा जाने छन्,’ सोमबार कंग्रेसका शीर्षनेताहरूको बैठकपछि राहुलले संवाददाताहरूसँग भने।
यही बैठकले प्रियंका गान्धी वायनाडको उपचुनाव लड्ने निर्णय गरेको बिबिसीले जनाएको छ।
यसअघि राहुलले आफू निर्वाचित दुई सिटमध्ये कुन राख्ने र कुन छाड्नेमा दुबिधा भइरहेको बताएका थिए। उनले भनेका थिए, ‘हामी यस्तो निर्णय लिनेछौं, जसले दुवै निर्वाचन क्षेत्रका मतदाता खुसी होऊन्।’
कांग्रेस नेता प्रियंका गान्धीले वायनाडको प्रतिनिधित्व गर्ने अवसर पाएकोमा आफू हर्षित भएको बताएकी छन्।
‘वायनाडका जनतालाई म राहुलको कमी महसुस हुन दिने छैन,’ प्रियंकालाई उद्धृत गर्दै बिबिसीले लेखेको छ, ‘वायनाडको प्रतिनिधित्व गर्न पाउँदा म एकदमै खुसी हुनेछ। राहुलले आफू बारम्बार वायनाड आइरहने बाचा गरेका छन्। म पनि यहाँका जनतालाई खुसी राख्न निकै मेहनत गर्नेछु।’
